ငမိုးရိပ်မှ ငမိုးရိပ်သို့, အပိုင်း (၃)/ တင့်ဆန်း

ကျွန်တော်၏ အဘိုးနှင့်အဘွားမှာ ရွာ၏ မြောက်ဘက်ရွာနှင့် ၂ မိုင်ကျော်ကျော်ဝေးသော ခုံကြီးခေါ်အရပ်နှင့် ငမိုးရိပ်ကမ်းခြေတွင် လယ်အလုပ်ကို လုပ်ကိုင်နေကြသည်။ အဘွားလေးနှင့် အဘိုးလေးမှာ ထိုခုံကြီးအရပ်တွင်ပင် ဖြစ်သော်လည်း အဘိုးအဘွားတို့ လယ်တဲနှင့် သူတို့လယ်တဲ မှာ တစ်မိုင်ခွဲခန့် ကွာဝေးလေသည်။ သူတို့သည်လည်း ငမိုးရိပ်၏ ကမ်းစပ်တွင်ပင် လယ်တဲဆောက် လုပ်၍ လယ်အလုပ်ကို လုပ်ကိုင်ကြလေသည်။ ထို့ကြောင့် ကျွန်တော့်မှာ ငယ်စဉ်သိတတ်သည့် အရွယ်ကပင် တစ်လလျှင် အဖေ အမေထံတွင် ဆယ်ရက်၊ အဘိုးအဘွား ထံတွင် ဆယ်ရက်၊ အဘိုးလေး အဘွားလေးထံတွင် ဆယ်ရက်စီ လှည့်လည်၍ နေထိုင်ခဲ့ရပါသည်။

    ယင်းသို့ နေထိုင်ခဲ့ရာမှ အမေ အဖေ့ထံမှ အဘွားလာရောက်ခေါ်သွားစတွင် အဘွားနှင့် အဘိုးကို၎င်း၊ အဖေအမေ ကို၎င်း၊ လွမ်း၍ငိုရသည်။ အဘိုးလေး အဘွားလေးတို့ထံမှ အမေက လာခေါ်ပြန်လျှင်လည်း အဘိုးလေး အဘွားလေးနှင့် အဘွားအဘိုးများကို လွမ်း၍ ငိုသည်။ ထိုသို့ ဖြင့် ကျွန်တော့်မှာ တစ်လလျှင် အနည်းဆုံးလွမ်း ၍ သုံးခါငိုရစမြဲပင်။
    ကျွန်တော့်အား တစ်အိမ်မှ တစ်အိမ်ကလာ၍ ခေါ်လေတိုင်း ကျန်ရစ်ခဲ့သော လူကြီးများမှာ လည်း မျက်နှာ မရွှင်မလန်းနှင့် ဖြစ်ကျန်ခဲ့ကြလေသည်။ အထူးသဖြင့် ကျွန်တော်သည် အဘိုးနှင့် နေရသည်ကို အပျော်ပိုက် ဆုံးဖြစ်သည်။ အဘိုးသည် ဇာတ်နိပါတ် ရာဇ၀င်နှင့် ပုံပြင်များကို ညစဉ် ညတိုင်း ပြောပြပြီး ကျွန်တော့်အား သိပ်လေသောကြောင့်ပင်။

    အမေနှင့် အဘွားတို့မှာ စာတတ်သူများ မဟုတ်ကြ။ အဖေသည် တရားဓမ္မ၌ ၀ါသနာထုံ သူဖြစ်၍ ကျွန်တော့် အား ထွဋ်ခေါင်ဆရာတော်၏ သ့ဝေဂသံပေါက်များ၊ “ယံမင်္ဂလာ”အစရှိသော မင်္ဂလာသုတ် ပါဠိများကို နှုတ်တိုက် သင်ပေးထားဘူးလေရာ ညဘက်တွင် တစ်ရပ်တစ်ရွာမှ ညအိပ် လာရောက် ကောက်စိုက်ကြသော ကောက်စိုက်မများအား ကျွန်တော်က ဆို၍ပြလေရာ ကောက် စိုက်သမ များ က အလုပ်ရှင်၏ သားဖြစ်၍လားမသိ ကျွန်တော့်အား ချီးကျူးစကားဆိုကြလေသည်။

    အဘိုးလေး အဘွားလေးတို့မှာ ကျွန်တော့်အား အစားအစာကောင်းများကျွေးသည်။ ကစား စရာများကို ဖန်တီး လုပ်ကိုင်ပေးသည်။ ထို့ကြောင့် ကျွန်တော့်မှာ တစ်အိမ်တွင် တစ်မျိုး ပျော်ပိုက် ခဲ့ရပါ၏။
    ကျွန်တော် မူလတန်းကျောင်းရောက်၍ တစ်လကျော်ခန့်ကြာသောအခါ အဖေသည် ကျွန်တော့်အား ရွာဦးဘုန်းတော်ကြီးကျောင်းသို့ ပြောင်း၍ ထားပြန်သည်။ ကျွန်တော်သတိရသည် မှာ မူလတန်းကျောင်းအုပ် ဆရာသည် ကျောင်းသားများအား ပညာကောင်းစွာ သင်မပေးဘဲ ဖဲရိုက်နေတက်သောကြောင့် တစ်ကြောင်း၊ ရွာဦးကျောင်းဘုန်းတော်ကြီးကျောင်းမှာ အစိုးရ အသိအမှတ်ပြုသော ကျောင်း မဟုတ်သော် လည်း ဦးပဉ္စင်းတစ်ပါးက အစိုးရကျောင်းကဲ့သို့ပင် လောကီစာပေများကို သင်ကြားပေးသောကြောင့် ဟုပင် ဖြစ်လေသည်။

    မိုးတွင်းလေးလ၌ ကျွန်တော်သည် အဘွားလေးနှင့် နှစ်လ အဘွားနှင့် နှစ်လနေခဲ့ရပါ၏။ ထိုလေးလအတွင်း ကျွန်တော်သည် လောကုတ္တရာ စာပေ၌ အောင်ခြင်းရှစ်ပါးအထိ သင် ၍ လောကီစာပေ၌ ပထမတန်းဖတ်စာနှင့် အပေါင်းအနှုတ်များ ကို တတ်မြောက်ခဲ့ပါသည်။
    သီတင်ကျွတ် ကျောင်းပိတ်ရက် ကုန်ဆုံးပြီးသောအခါ ကျွန်တော်တို့အား လောကီစာပေ သင်ကြားပေးသော ဦပဉ္စင်းကြီးမှာ ဒကာဒကာမများနှင့် ကောင်းစွာမသင့်သဖြင့် ဘုရားကုန်း ရွာသို့ ပြောင်းရွှေ့ သွားလေသည်။ ဘုရားကုန်းရွာမှာ ကျွန်တော်တို့ ဖောင်ကြီးရွာနှင့် ဆိုလျှင် ၃မိုင် ခွဲခန့် ကွာဝေး ၏။

    ရွာဦးကျောင်းတွင် နေခဲ့ရာ၌ ကျွန်တော်တို့မှာ လောကုတ္တရာ စာပေကိုသာ အနည်းအပါး သင်ရပြီးနောက် ဆော့ကစား၍ ၄င်း၊ ဆွမ်းအိုးထမ်းသပိတ်ပိုက် ဘုန်းတော်ကြီးများနှင့် အလှူ လိုက် ဖြင့် တစ်ဆောင်း တစ်နွေကုန်ခဲ့ရလေတော့သည်။
    အဖေသည် ကျွန်တော်၏ ပညာသင်ကြားရသော အခြေအနေကို သိသောအခါ အားမလို အားမရ ရှိနေလေ သည်။ သို့သော်လည်း ဘုရားကုန်းကျောင်းသို့ ပြောင်းထားရန်ကို အဘိုးလေးမှ အပ အားလုံးက ကန့်ကွက်ကြသောကြောင့် အဖေသည် ဘာမျှမတတ်နိုင်ရှာဘဲ နေရ၏။ ရွာမှ မူလ တန်းကျောင်းသည်လည်း ဆရာ ၏ အကျင့်ပျက်မှုကြောင့် အစိုးရက ကျောင်းပါဖျက်၍ ပစ်လိုက်လေ ပြီ။
    “ဒီလို လောကုတ္တရာစာပေ မတောက်တစ်ခေါက် သင်နေလို့တော့ ကျောင်းထားလဲ အပို ပါပဲ။ ဒီလောက်တော့ အိမ် မှာပဲ ကိုယ့်ဟာကိုယ် သင်ပေးတော့မယ်”
    တစ်နေ့တွင် အဖေက ဤသို့ပြောပြီး ကျွန်တော့်အား ကျောင်းမှ နှုတ်လိုက်သည်။ ပြီးနောက် အိမ်တွင် နမက္ကာရ၊ ရတနာ ရွှေချိုင့်စသည်တို့ကို သင်ပြပေးလေသည်။

    ကျွန်တော်မှာ ယခင်ငယ်စဉ်ကကဲ့သို့ပင် ၃ အိမ်ထောင်၌ လှည့်လည်၍ နေခဲ့ပြန်လေသည်။ ကျွန်တော့်အသက် ၁၂ နှစ်ကျော်ကျော် အရွယ်တွင် ရှင်ပြု၏။ မိုးတွင်းဘက်၌ ကိုရင်တစ်ဝါ၀တ်ရ လသည်။ ထိုစဉ် ၌ အထက်အညာရေစကြိုမြို့မှ အသားမည်းမည်းနှင့် လူတစ်ယောက် ကျွန်တော် တို့ ကျောင်း သို့ ရောက်ရှိလာလေသည်။ ထိုသူသည် ကျွန်တော်တို့ကျောင်းမှ ကျောင်းသား ကိုရင်များအား အင်္ဂလိပ်စာ သင်ကြားပေး၏။ ကျွန်တော်တို့ ကျောင်းသားကိုရင်များ နှင့်မိဘများမှာ ၀မ်းသာကြရပြန်လေသည်။
    ဆရာသည် ကျောင်းတွင်စား၍ ကျောင်းတွင်နေသည်။ ကျောင်းသားမိဘများသည် ဆရာ အား လစဉ်ငွေများ စုဆောင်းပေးကြသည်။ ထိုဆရာသည် ငွေများကို မသုံးဘဲ စုထားလေသည်။ ၃-လခန့် သင်မိသော အခါ ကျွန်တော်သည် ပရိုင်မာဘုတ်ဝမ်းကို တစ်ဝက်လောက်ရေးနိုင်ဖတ်နိုင်လာ သည်။ ယင်းအချိန် တွင် ဆရာသည် စာအုပ်ဝယ်ရန် ကျောင်းသားများအား ငွေခွဲ၏။ ကျောင်းသား များရော မိဘများ ကပါ အားကျိုးမာန်တက် ငွေထည့်ကြသည်။ ပြီးနောက် ဆရာသည် ရန်ကုန်သို့ စာအုပ် ၀ယ်သွားလေ ရာ ပြန်၍ မလာတော့ပါချေ။

    သီတင်းကျွတ်၍ ရှင်လိင်ပြန်သောအခါ အမေ မကျန်းမာ၍ ကျွန်တော် ကျောင်းမှထွက်ခဲ့ ရပြန်သည်။ အမေ မှာ ချူချာလျ၏။ မကြာခဏ ဖျားနာရုံသာမက ညနေတိုင်း လေနာသောရောဂါ ထ၍နေလေသည်။ ကျွန်တော့် မှာ အိမ်မှုကိစ္စ ဗာဟီရများကို အမေ့အား ကူညီလုပ်ကိုင်ပေးနေရ၏။ ထိုစဉ်တွင် စပါးဈေးများ အလွန်ကျဆင်း သွားတော့ကာ ကျွန်တော့်တို့ပိုင်လယ်များ၊ အဘိုး အဘွားတို့ပိုင် လယ်များ၊ အဘွားလေး အဘိုးလေး တို့ပိုင်သော လယ်များ ချစ်တီးလက်သို့ အပ် လိုက်ကြရလေတော့သည်။
    ယင်းသို့ ရှိသောအခါ ကျွန်တော့် မိဘများသာ ချစ်တီးထံမှ သီးထောက်ခနှင့်ယူ၍ လယ် အလုပ်ကို ဆက်လုပ် သည်။ အဘိုး အဘွားတို့သည် လယ်အလုပ်ကို စွန့်လွှတ်၍ ခြံအလုပ်၊ ကိုင်း အလုပ်များကို လုပ်ကြ ၏။ အဘိုးလေး သည် နွားများကိုရောင်း၍ ကြွေးဆပ်ကာ လျည်းကူးသို့သွား၍ ပုလိပ်လုပ်လေရာ အဘွားလေး ပါ လိုက်ပါ၍ သွားရလေတော့၏။ ထိုစဉ်၌ အဘိုးလေးနှင့် အဘွား လေးတို့မှာ ကျွန်တော့်အား ချစ်သည် မှန်သော်လည်း ခွဲခွာနိုင်ကြပါပြီ။ ဟုတ်ပါ၏။ သူတို့တွင်လည်း သမီးငယ် တစ်ယောက်ရှိ၍ နေလေသည်။

    ကျွန်တော့်မှာ အမေ့အား ကူညီရင်းဖြင့် အဖေသင်ပြပေးသော ပရိတ်ကြီးစာအုပ်နှင့် သဂြိလ်စာအုပ်များကို ကျက်မှတ်သင်ယူနေလေသည်။ ပြီးနောက် ပြဇာတ်ဆန်းစာအုပ်များကိုလည်း ဖတ်သည်။ ဘူရိဒတ် နဂါးမင်း ပြဇာတ်ဆန်း စာအုပ်ကို ဖတ်ရင်းဖြင့် အလမ္ပာယ်နှိပ်စက်ခန်းတွင် ဘူရိဒတ်နဂါးမင်းအား သနားလွန်း ၍ ရှိုက်ငိုခဲ့ရသည်။
    ကျွန်တော့်မှာ ငယ်စဉ်ကပင် အဖော်မရှိ တစ်ယောက်ထီးတည်း နေခဲ့ရသူဖြစ်သောကြောင့် အခြားကလေး သူငယ်များနှင့် ကစားခုန်စားတတ်ခြင်းမရှိခဲ့ပါချေ။ ကျောင်းတွင်နေစဉ်ကလည်း တခြားကလေးများ ကစား ခုန်စားရှိနေစဉ် ကျွန်တော်နှင့် ၀ါသနာတူသူ သုံးလေးယောက်တို့သည် နေရာကောင်းတစ်ခု၌ထိုင်ကာ ပုံတိုပတ်စ များ ရယ်စရာ မောစရာများပြောရင်းဖြင့် အချိန်ကို ကုန် လွန်ခဲ့ပေသည်။

    အဖေသည် ပညာရေးဘက်၌ လိုလားသည် မှန်သော်လည်း စာဖတ်ခြင်းကို အားပေးသူ မဟုတ်ပါချေ။ အထူးသဖြင့် ခေတ်ပေါ် ဇာတ်ဝတ္ထုများကို ဖတ်လျှင်
    “မင်းကွာ အလကားဥစ္စာတွေဖတ်ပြီး အချိန်ဖြုန်းနေတယ်”
ဟု ပြောတတ်ပါလေသည်။
    အမေနှင့် ကျွန်တော့်မှာ စာဖတ်မှုနှင့် တကျက်ကျက်ဖြစ်ကြရသည်။ ကျွန်တော်သည် တွေ့ရာ ကြုံရာစာ ကိုဖတ်၏။ ဖတ်မိလျှင်လည်း တစ်ပုဒ်မဆုံးဘဲ လက်က ချချင်စတ်မရှိပေ။ အမေက ကျွန်တော် စာဖတ်နေဆဲ တွင် တစ်ခုခုကို ခိုင်းသော်လည်း ကျွန်တော်က ထလုပ်မပေးဘဲ ရှိနေတတ်လေရာ အမေ က အော်ငေါက်၍ပင် စာအုပ်များကို ဆွဲယူလွှင့်ပစ်တတ်လေသည်။ ထို အခါ၌ ကျွန်တော်က စိတ်ဆိုးရပြန် သည်။
    နေ့တွင် အမေ့အား ကူညီလုပ်ကိုင်ပေးနေရသောကြောင့် စာမဖတ်ရလျှင် ညဘက်၌ ကျွန်တော်က စာဖတ်သည်။ ထိုအခါတွင် အမေက အိပ်ရေးပျက်သည်။ ဖယောင်းတိုင် ကုန်သည်ဟု ဆူပြန်လေတော့ သည်။ ဆူလျှင်လည်း ဆူချင်စရာပါပေ။ ကျွန်တော် စာဖတ်သည်မှာ စည်းနှင့်ကမ်းနှင့်မဟုတ်။ စာအုပ်တွေ ရှိနေလျှင် တစ်ညလုံး မိုးအလင်းဖတ်သည်။ ထို့ကြောင့် ဖယောင်းတိုင်တွေများစွာကုန်ကာ နောက်နေ့၌ အလုပ်ကောင်းကောင်းမလုပ်နိုင်အောင်ပင် အိပ် ပျက်ခဲ့ရခြင်းဖြစ်လေသည်။

    တကယ်တော့လည်း ကျွန်တော် ဤသို့ စာကို စည်းကမ်းနှင့် မဖတ်နိုင်ခြင်းမှာ အကြောင်း ရှိပါသည်။ ကျွန်တော် တို့ရွာက လူများသည် တိုးတက်ခေတ်မှီသူများ မဟုတ်ကြဘဲ မိရိုးဖလာ လယ် အလုပ်၊ ခြံအလုပ် များ ကိုသာ လုပ်ကိုင် အသက်မွေးသူများလှသဖြင့် ပညာဗဟုသုတကို လိုလားသူ အတော်ရှားပါးပေသည်။ ရိုးရိုး သားသား စိုက်လိုက်မတ်တတ်သာ နေတတ်ကြ၏။
    ကြီးတော်၏ယောက်ျား ဘကြီးရှမ်းသည် မြို့သို့ အရောက်ပေါက်များသည်။ သူကြီး လည်း ဖြစ်ပါသည်။ ခေတ်မီသည်။ မင်းစိုးရာဇာများနှင့် အပေါင်းအသင်းရှိသည်။ အစားအသောက် အနေ အထိုင်မှ စ၍ မြို့ဆန်သည်။ ဗဟုသုတလိုက်စားသည်။ သူသည် အသက် ၆၀ ရွယ်အထိ ၀တ္ထုမဂ္ဂဇင်းများကို ဖတ်သေးသူဖြစ် သည်။ ကြီးတော်မှာလည်း ဘကြီးရှမ်းနှင့် ၀ါသနာတူသည်။ သူကြီးကတော် ပီသ၏။ မင်းကတော် စိုးကတော်များနှင့် ပေါင်းသင်းဆက်ဆံတတ်၏။ တောသူကြီး ကတော်မို့ မညံ့ပေ။ ခေတ်မီလေ သည်။ သူတို့၏သား ကိုသန်းမောင်မှာ လှည်းကူးအင်္ဂလိပ်ကျောင်း တွင် နေရ၏။ သားငယ် အုန်းမောင်မှာ ဘုရားကုန်း ဦးပဉ္ဇင်းတို့ကို ၀ယ်ယူဖတ်ရှုလေရာ တစ်အိမ် သားလုံးစာဖတ်ဝါသနာပါသည်။ ကျွန်တော့်မှာ သူတို့ထံ မှ စာအုပ်များကို ငှားရမ်းဖတ်ရှုရလေရာ အချိန်ဆွဲ၍ စံနစ်တကျ ဖတ်မနေနိုင်ဘဲ ရသည့်အချိန်ကို တအား လု၍သာ ဖတ်ခဲ့ရလေတော့သည်။

    ကျွန်တော် ပထမဆုံး ဖတ်ရသော ခေတ်ပေါ်လုံးချင်းဝတ္ထုမှာ ဆရာမြမျိုးလွင်ရေးသော “တယောသံ” ၀တ္ထုဖြစ် သည်။ ကြီးတော်တို့ အိမ်သားများနှင့် ထိုဝတ္ထုအကြောင်းကို မကြာခဏ စားမြုံ့ပြန်ရသည်။ နေ့စဉ် သတင်းစာ မှ အခန်းဆက် စောင့်ဖတ်ရသော ဆရာကြီး ပီမိုးနင်း၏ “သဲမြညှာ” “၀င်္ကပါကံ”တို့မှာ ကျွန်တော် တို့၏ အသည်းစွဲဖြစ်သည်။ သက်စောင့်မဂ္ဂဇင်းမှ ဆကာကြီး ထိပ်တင်၏ ဟာသ၀တ္ထုတို များကိုလည်း နှစ်သက်သည်။
    အမေသည် တစ်နှစ်ထက် တစ်နှစ်ပို၍ ချူချာလာ၏။ ကျွန်တော်မှာ အိမ်အလုပ် တောက် တိုမယ်ရများ သာမက ထမင်းဟင်းများကိုပါ ချက်ပေးနေရသည်။
    ကျွန်တော်သည် လှည်းကူးကျောင်းမှ ကျောင်းပိတ်၍ ပြန်လာပြီး တသွေးတမွေး ဖြစ်နေသော အကို ကိုသန်းမောင် ကို အားကျသည်။

    “အဖေ၊ ကျွန်တော့်ကို လှည်းကူးကျောင်းမှာ ကျောင်းထားပေးပါ”
    တစ်ညတွင် အဖေ့အား ကျွန်တော်က ပူဆာသည်။
    “အဖေကလဲ လူလေးကို သိပ်ပြီး ပညာတတ်စေချင်ပါတယ်ကွယ်။ ဒါပေမယ့် တို့မှာ ခက် တာက မင်း အတွက် ကျောင်းစရိတ်ကို တတ်နိုင်ပါတယ်။ မင်း ဟိုမှာ နေဖို့ ထိုင်ဖို့ ရင်းရင်းချာချာ မရှိတာက ခက်တယ်”
    အဖေက ညည်းသံနှင့် ပြန်ပြောသည်။
    “ကိုသန်းမောင် နေတဲ့အိမ်မှာပဲ ထမင်းလခပေးပြီး နေမှာပေါ့အဖေရဲ့”
    “အဲဒါက ကိုရှမ်း ရဲ့ ဆွေမျိုးကွ။ တို့နဲ့ လုံးလုံးသိကြတာမှ မဟုတ်ဘဲ။ ပြီးတော့လဲ မင်းမေမေက ကျန်းကျန်း မာမာ မဟုတ်တော့ မင်းကို ခွဲနိုင်မှာ မဟုတ်ဘူး”
    “အို ဘယ်ဖြစ်မလဲ သားရယ်။ အမေက နေ့ သေမလား၊ ညသေမလားဆိုတာမျိုး ဖြစ်နေရတဲ့ ကြားထဲမှာ ငါ့သား ကို တစ်မြို့တစ်ရွာခွဲပို့မထားနိုင်ပါဘူး” အဖေနှင့် ကျွန်တော် ပြောနေ သံကို ကြားရလေရာ အမေ သည် ခါးခါးသီးသီး ၀င်၍ပြောလေသည်။

    “ကျွန်တော် လယ်သမား မလုပ်ချင်ဘူး အမေ။ ကျွန်တော် ပညာတတ်ချင်တယ်။ ပညာ တတ်မှ လယ်သမား မလုပ်ရမှာ”
    ကျွန်တော်က ဤသို့ ပြောလိုက်လေရာ အမေသည် ခေတ္တမျှတွေနေပြီး
    “လယ်သမား မလုပ်ချင်လဲ မင်းကြီးတော့ ကုန်သည်လုပ်ပေါ့ကွယ်။ ကုန်သည်အလုပ်ဆိုတာ ပညာတတ်ဖို့ မလိုပါဘူး။ ရောင်းတတ် ၀ယ်တတ်ရင် ပြီးတာပဲ။ ခုလို မကျန်းမာနေတဲ့အခြေမှာ သားကို အမေ ဘယ်နည်းနဲ့မှ ခွဲမထားနိုင်ဘူးကွယ်”
    အမေ၏ စကားက လမ်းဆုံးနေပြီ။ ဘယ်နည်းနှင့်မျှ စောဒကတက်၍ ရမည်မဟုတ်တော့။ ထို့ကြောင့် ကျွန်တော် လည်း သက်ပြင်းကို ချလျက် အကြံကို လက်လျော့လိုက်ရလေတော့သည်။
    ကိုသန်းမောင်မှာ သူကြီးသားလည်းဖြစ်၊ အင်္ဂလိပ်ကျောင်းသားလည်းဖြစ်၊ ရုပ်ရည်ကလည်း သန့်ပြန့်နေသောကြောင့် ရွာတွင် မျက်နှာပွင့်လန်းလှသည်။ ခေါ်ချင် ပြောချင်သူ များလှသည်။ တစ်ရွာလုံးက ၀ိုင်းချီးမြှောက်ကာ ကောင်းချီးသြဘာ ပေးကြလေသည်။

    ဘကြီးရှမ်းနှင့် ကြီးတော်တို့ကလည်း သားကို အလိုလိုက်ကြသည်။ ကျွန်တော်မှာ ကိုသန်းမောင်၏ အဖြစ်ကို မြင်တွေ့ရသောအခါ ၀မ်းနည်းမိတာ မျက်ရည်များပင် စို့ခဲ့ရလေသည်။ ကျွန်တော့်မှာ ကိုယ့် ဘ၀ကိုယ် ၀မ်းနည်းမိသော်လည်း အားတော့ဖြင့် မလျော့။ ပညာမတတ်သော် လည်း ဗဟုသုတ ရှိသူတစ်ယောက်ဖြစ်အောင် ကြိုးစားမည်ဟု အားခဲကာ တွေ့ကြုံရာ စာအုပ်များ ကိုသာဖိ၍ ဖတ်နေရတော့သည်။
    ကျွန်တော် အသက် ၁၄ နှစ်ကျာ် ၁၅ နှစ်ထဲသို့ ရောက်ရှိလာသောအခါ အဘိုးသည် အသက်ကြီး၍ ခြံအလုပ် ကိုပင် မလုပ်နိုင်သောကြောင့် ခုံကြီးရှိခြံကို စွန့်လွှတ်ကာ ရွာသို့ပြောင်း၍ နေထိုင်ကြသည်။ သို့သော် အဘိုးနှင့် အဘွားသည် ကျွန်တော်တို့၏ အိမ်၌ မနေကြဘဲ အိမ်ကြီးဝင်း ထဲတွင် အိမ်ကလေး တစ်အိမ် ဆောက်လုပ်နေထိုင်ကြလေသည်။

    အဘိုးလေးမှာ လှည်းကူး၌ ခဏခေတ္တသာ နေထိုင်ရပြီး ပုလိပ်အလုပ်နှင့်ပင် အင်းစိန်သို့ ရွှေ့ရလေသည်။ အင်းစိန်ရှိ အဘိုးလေး အဘွားလေးတို့ထံ အလည်လာခဲ့သည်။ မြို့သို့ အရောက် အပေါက် နည်းသူ ဖြစ်သောကြောင့် မြင်မြင်သမျှတို့မှာ နှစ်သက်စရာ မက်မောစရာများချည်းဖြစ်နေ လေသည်။ ကျွန်တော် သည် ရွာသို့ ပြန်လိုစိတ် လုံးဝမရှိတော့ဘဲ မြို့၌သာ ပျော်ပိုက်နေမိသည်။
    ကျွန်တော် အင်းစိန်တွင်နေ၍ ရက်ပေါင်း ၂၀ ခန့်ကြာသောအခါ အမေက လူတစ်ယောက် ကိုလွှတ်၍ အခေါ် ခိုင်းသောကြောင့် မလိုက်ချင် လိုက်ချင်နှင့်ပင် ပြန်လိုက်သွားရလေသည်။ ကျွန်တော်သည် ထိုအချိန် မှ စ၍လည်း တောကို စိတ်အပျက်ကြီးပျက်ကာ မြို့ကို နှစ်သက်ခင်တွယ် နေမိပါတော့သည်။ ကျွန်တော့်မှာ ထိုအချိန်မှစ ၍ စိတ်ပြောင်းလာခဲ့သည်။ ဟုတ်ပါ၏။ ပျင်းရိငြီးငွေ့ ဖါယ်သော လယ်တောကို စိတ်ပျက် လာသည်။ တစ်ယောက်ထီးတည်း လူကြီးမိဘများနှင့် နေရ သည်ကို ငြီးငွေ့လာသည်။ ထို့ကြောင့် နေ့ တွင်သာ လယ်တဲ၌နေလျက် ညဘက်များတွင် ရွာသို့ ပြန်အိပ်လေတော့သည်။

    အမေသည် ကျွန်တော့်အား သူ့အပါးတွင် နေ့ရောညပါရှိ၍ နေစေချင်သည်။ ဒါပေမယ့် လည်း ကျွန်တော်က ဇွတ်ရွာသို့ ပြန်အိပ်သောအခါ အမေမှာလည်း မတားသာဘဲ ရှိနေရှာတော့၏။
    ကျွန်တော့်မှာ တစ်ယောက်ထီးတည်း နေ၇သောဘ၀မှ အဖော်အပေါင်းနှင့် နေရသောဘ၀ကို ခင်တွယ် လာသည်။ ညဘက်တွင် ကာလသမီး ကာလသားများ စု၍ အိပ်ကြသော အိမ်သို့ ကျွန်တော် လည်းရောက်ရှိ၍သွားပေသည်။ ထိုအိမ်မှာ ကျွန်တော်နှင့် ဆွေမျိုး နီးစပ်တော်စပ် ၍ ပျော်ပျော် ပါးပါး နေတတ်ကြသည်။ ညဘက်တွင် ကာလသမီး ကာလသားများစု၍ အုန်းနို့ဆန်ပြုတ်၊ ဂျင်းသုတ်၊ လက်ဖက်နှင့် ရေနွေးကြမ်း စသည်တိုကို လုပ်ကိုင်စားသောက်ကြကာ ထုံးခွေတမ်း ပုဆစ်ပစ်ကြသည်။ ပြီးနောက် ရယ်စရာ မောစရာများကို ပြော၍ တသောသော ရှိနေ တတ်ကြသည်။

    ထိုအိမ်ရှင်သည် သစ်ကုန်သည်များ ဖြစ်ကြ၏။ အိမ်ရှင်ဒေါ်သန်းမြိုင်မှာ ၀တ္ထုဖတ် ၀ါသနာပါသည်။ ပြီးနောက် ထိုအိမ်သို့ လာရောက် အိပ်လေ့ရှိသော အပျိုစင် မခင်မေမှာလည်း စာဖတ်ဝါသနာပါသည်။ မခင်မေ မှာ ရန်ကုန်သို့ မကြာမကြာ သွားရောက်ကာ သူ့အစ်မ၀မ်းကွဲ မင်း ကတော်များထံမှ ၀တ္ထုစာအုပ်၊ မဂ္ဂဇင်း စာအုပ် အဟောင်းများကို သယ်ယူလာတတ်ပေရာ ကျွန်တော့်မှာ ညစဉ်ညတိုင်း စာအုပ်များကို အားရပါးရ ဖတ်ခဲ့ရလေသည်။
    ဒေါ်သန်းမြိုင်နှင့် မခင်မေတို့မှာ ရွာတွင် အတော်စာဖတ်သူများဟု နာမည်ကြီးခဲ့သော် လည်း ကျွန်တော်နှင့်ကျတော့ သူမတို့က အရှုံးပေးရလေသည်။
    “မင်းကိုတော့ တို့မမီဘူးဟေ့။ တို့က ညဆယ့်နှစ်နာရီတစ်ချက်ထက် ပိုမဖတ်နိုင်ဘူး။ မင်းကတော့ ညလုံးပေါက်ကို ဖတ်တာပဲ”
    မခင်မေ သည် နံနက်ခြောက်နာရီခွဲအထိ စာဖတ်နေသေးသော ကျွန်တော့်အား ကြည့်၍ ပြောပါသည်။

    “တစ်ညတလေများ အမေတို့န့ အိပ်ပါဦးလားသားရယ်။ မင်းမလဲ ညတိုင်းပဲ ရွာကို သွားသွားနေရတယ်”
    တစ်ညတွင် အမေကပြောသောကြောင့် ကျွန်တော်သည် အမေ့အား သနားလာသည်နှင့် ထိုညရွာသို့ မသွားတော့ ဘဲ လယ်တဲ၌သာ အိပ်လိုက်လေသည်။
    နောက်တစ်နေ့ ကျွန်တော် ရွာသွား၍ ဒေါ်သန်းမြိုင်တို့ အိမ်သို့ ရောက်ရှိသောအခါ အပေါင်းအသင်း ပျော်ဖော်ပျော်ဖက်များက မနေ့ညက မလာခြင်းအကြောင်းကို မေးကြသဖြင့် ကျွန်တော်က အမေ စိတ်မကောင်းမည်စိုး၍ မလာကြောင်း ပြန်ပြောပြလိုက်ရသည်။
    “နင် မနေ့ညက မလာတော့ ငါ့စိတ်ထဲမှာ တစ်မျိုးကြီးပဲဟဲ့။ နင်ကို အောက်မေ့သလိုလိုနဲ့”
    ဒေါ်သန်းမြိုင်၏ သမီးဖြစ်သူ ကျွန်တော်နှင့် အသက်အရွယ်တူ နှင်းအေးက ဤသို့ပြော လေရာ ကျွန်တော်၏ ရင်ထဲတွင် တစ်မျိုးသောခံစားမှုကို ခံစားလိုက်ရလေသည်။

    ကျွန်တော်သည် တွေးချင်တောချင်လာသည်။ သူက ငါ့ကို ဘာဖြစ်လို့ အောက်မေ့ရတာ လဲ။ ဘာဖြစ်လို့ သူ့စိတ်ထဲမှာ တစ်မျိုးဖြစ်ရတာလဲ။ ကျွန်တော်သည် ဤသို့ တွေးတောရင်းဖြင့် နှင်းအေးအား ရွှန်းရွှန်းစားစား ကြည့်လိုက်သည်။
    နှင်းအေးမှာ ခြောက်လက်မ ဆံတောက်ကြီးကားကား၊ အသားကလည်း ၀ါရွှေရွှေ၊ နှာတံ ပေါ်၍ မျက်လုံးမျက်ခုံး ကလည်း လှပပြတ်သားသည်။ သွားကလေးများက ပုလဲလုံးကလေးများ စီ ထားသလို ဖြူဖွေး ညီညာကာ နှုတ်ခမ်းနှစ်လွှာကလည်း ဆေးမဆိုးဘဲနှင့် နီရဲနေသည်။ ကိုယ်လုံး ကလေးမှာ ခပ်ပြားပြားရှိကာ ခါးကသေးသည်။ ရင်ကလေးနှစ်စုံမှာ မောက်ဖြိုးစပြု၍ နေလေပြီ။ တင်ကလေးကလည်း ခပ်တောင့်တောင့် ခပ်မာမာနှင့် ဖူးစ ပန်းငုံသဖွယ် မက်မောတွယ်တာဖွယ်ရာ ဖြစ်နေတော့သည်။

    ကျွန်တော့်မှာ သူမအား သေချာစွာကြည့်မိတော့မှ ရင်များခုန်၍ လာခဲ့ရတော့သည်။ နှလုံး သားတွင် အမည် မဖော်တတ်သော လှိုင်းဂယက်များက လှုပ်ရှားနေတော့ပြီ။
    ကျွန်တော့်အသက် ၁၆ နှစ်အရွယ်သို့ ရောက်သောအခါတွင် အမေ သေဆုံးသွား၏။ အဘိုး လည်း လွန်ခဲ့သောနှစ်က ဆုံးခဲ့လေပြီ။ အဘွားသည် ကျွန်တော်တို့နှင့်အတူနေ၏။ အိမ်ကလေးကို လည်း ဖျက်ပစ်လိုက်လေပြီ။ အဘွားမှာ အသက်အရွယ်ကြီးလှပြီဖြစ်သောကြောင့် အိမ်ထောင်ထိန်း သိမ်းရေး တာဝန်ကို မယူနိုင်။ ကျွန်တော်သာလျှင် အိမ်ထောင်ထိန်းရတော့သည်။
    “အခုလို မင်းအိမ်ထောင်ကျကျနန ထိန်းနိုင်တာ အဖေ၀မ်းသာပါတယ်ကွာ။ ဒီအတိုင်းသာ ဆိုရင် အဖေလည်း နောက် အိမ်ထောင်ပြုဖို့မလိုပါဘူး”
    အဖေက ကျွန်တော် စနစ်တကျ အိမ်ထောင်ထိန်းသိမ်းပုံ၊ စာရင်းငှား ကောက်စိုက်သမများ ကိုစနစ်တကျ ချက်ပြုတ်ကျွေးမွေးပုံတို့ကို ကြည့်ကာ အားရ၀မ်းသာ ပြောပါလေသည်။

    ထိုအချိန်၌ အဘွားလေးသည် ရွာသို့ပြန်လာကာ စုဆောင်းထားသော ငွေကြေးများနှင့် ကျွန်တော်တို့ အိမ်ကြီးတွင် ကုန်ခြောက်ဆိုင်ဖွင့်၍ ရောင်းချနေလေသည်။ ကျွန်တော်သည် နေ့တွင် သာလယ်တဲ၌ အဖေနှင့်အတူ နေသော်လည်း ညများတွင် ရွာသို့ပြန်လာကာ ဒေါ်သန်းမြိုင်တို့အိမ်၌ စတည်းချလေသည်။ အမှန် အတိုင်း ၀န်ခံရပါမူ ကျွန်တော်သည် နှင်းအေး၏ ရူပါရုံကွန်ယက်၌ ငြိ တွယ်လျက် ရှိနေရပြီဖြစ် ပါသတည်း။
    ကျွန်တော့်မှာ အချိန်ရှိသမျှ နှင်းအေး၏ ချောမောလှပသော ရုပ်ပုံကလေးကို မျက်စိအာရုံ ထဲ၌ ရစ်ဝဲနေကာ သူကလေးကို အစဉ်သတိရနေတတ်ပေသည်။ ထို့ကြောင့်လည်း ညနေသို့ ရောက်လေလျှင် ရွာသို့သွားဖို့ အရေးသာ တွေးတောနေမိသည်။ လုပ်စရာ ကိုင်စရာများကို ညနေသို့ မရောက်ခင် ပြီးနှင့်အောင် ကြိုးစားလုပ်သည်။

    “တစ်ခါတစ်လေများ ရွာမသွားဘဲနေပါဦးလား လူလေးရဲ့။ မင်းမလဲ နေ့တိုင်းပဲ ရွာကိုသွား ရတာ မမောဘူးလား”
    တစ်ညနေ ကျွန်တော် ရွာသို့သွားရန် အ၀တ်အစားလဲနေစဉ် အဖေက ကျွန်တော့်အား ပြုံး စေ့ေ စ့နှင့်ကြည့်ရင်း ပြောလေသည်။
“ညည သူငယ်ချင်းတွေနဲ့ ရယ်ကာမောကာ နေနေကျတော့ ဒီလယ်တဲမှာ ညအိပ်ရမှာ သိပ်ပျင်း တာပဲ အဖေရဲ့”
    “ဟုတ်ပါရဲ့လားကွာ။ မင်း နှင်းအေးကို မျက်စိကျနေတယ်မို့လား။ အဖေ့ကို လိမ်မပြောပါနဲ့ သားရာ။ အဖေ ဟာ ငယ်ရာက ကြီးလာတာပါ”
    အဖေက ဤသို့ပြောလေရာ ကျွန်တော့်မှာ ရှက်စိတ်များ မွှန်ထူသွားပြီး အဖေ့အား ဘာမျှ ပြန်မပြောမိဘဲ ခေါင်းငုံ့၍ နေလိုက်မိလေသည်။
    “နှင်းအေးဟာ မဆိုးပါဘူး။ တို့နဲ့လည်း ဆွေရိပ်မျိုးရိပ် မကောင်းဘူး။

နို့ပြီးတော့ ရုပ်ကလေး ကလည်း ဒီရွာထဲမှာဆိုရင် သူနဲ့ရွယ်တူထဲမှာ သူအချောဆုံးပဲ။ ဒါပေမယ့် သန်းမြိုင်တို့ လှဖေ တို့နဲ့၊ တို့နဲ့က အဆင့်အတန်းချင်း မတူကြဘူး။ သူတိ့က ကုန်သည်၊ တို့က လယ်သမား။ ပြီး တို့ထက် လည်း အခြေအနေ သာတယ်ဆိုပါတော့ကွာ”
    အဖေသည် ဤသို့ ပြောနေရာမှ ကျွန်တော့်အား ကြင်နာသော မျက်လုံးများဖြင့် စိုက်၍ ကြည့်လိုက် ပါသည်။ ပြီးနောက် သက်ပြင်းကို အသာရှိုက်လိုက်ပြီး စကားဆက်၍ ပြောလေ၏။
    “အင်းလေ မင်းတို့ လူငယ်ချင်း မေတ္တာမျှကြရင် အဖေကတော့ သဘောတူမှာပါပဲ။ ဒါပေ မယ့် မင်းတို့ရဲ့ အသက် အရွယ်တွေကလည်း အလွန်ငယ်ကြပါသေးတယ်”
    အဖေက ဤသို့ပြောပြီးနောက် ကျွဲတင်းကုတ်ထဲသို့ ဆင်း၍ သွားလေတော့သဖြင့် ကျွန် တော့်မှာ အ၀တ်အစား လဲပြီး တဲပေါ်မှ ဆင်းလာခဲ့ရသည်။ လမ်းတစ်လျှောက်လုံးတွင်လည်း နှင်းအေးတို့က ကျွန်တော် တို့ထက် အဆင့်အတန်းမြင့်သည်ဟူသော အတွေးကိုသာ တွေး၍ လာခဲ့ မိလေသည်။

    ကျွန်တော်သည် အဖေ့ထံမှ ဤစကား ကြားရပြီးသည့်နောက်၌ နှင်းအေးတို့သားအမိ၏ သဘောထားကို အကဲခတ်ကြည့်ခဲ့သည်။
    နှင်းအေး က ကျွန်တော့်အပေါ်၌ အစစအရာရာ လိုက်လျောသော်လည်း သူ့မိခင် ဒေါ်သန်းမြိုင်မှာ ကျွန်တော်နှင့် နှင်းအေးတို့ ခင်မင်နေသည်ကို လိုလားပုံမရချေ။
    သို့နှင့် နှင်းအေးတို့အိမ်သို့ သွားရဖို့ကို အလိုလိုနေရင်း ကျွန်တော်၏ စိတ်ကရွံ့နေမိသည်။ ထို့ကြောင့်လည်း ကျွန်တော် ရွကိုပင် မသွားတော့ဘဲ လယ်တဲ၌သာ နေခဲ့သည်။ အဖေသည် ကျွန်ော့်အား အကဲခတ်သော မျက်လုံးများဖြင့် မကြာခဏ ကြည့်သည်။ သို့သော် တစ်ကြိမ်တစ်ခါမျှ မေးမြန်းခြင်းမပြုဘဲ ဘာသိဘာသာပင် နေလေသည်။

    ကျွန်တော်သည် လေးရက်တစ်ပတ် ငါးရက်တစ်ပတ် ရွာသို့သွားသော်လည်း နှင်းအေးတို့ အိမ်သို့ မသွားဘဲ နေခဲ့သည်။ ထိုအချိ်န်၌ အဘိုးလေးသည် ပုလိပ်အလုပ်မှထွက်ကာ ရွာသို့ပြန်လာ သည်။ အဘွားလေး၏ ဈေးဆိုင်မှာလည်း အရောင်းရတွင်ကျယ်လာသည်။ ကုန်ခြောက်များသာမက အ၀တ်အထည် များကိုလည်း ရောင်းလေသည်။ ကျွန်တော်တို့ရွာမှ ကာလ သမီးကာလသားတို့သည် ရင်းနှီးရာအိမ်၌ စု၍ အိပ်တတ်ကြသည့် သဘာဝရှိကြသည်။ ကျွန်တော်၏ အဘွားလေးမှာလည်း ကာလသမီး ကာလသားများ အလိုကို လိုက်တတ်သူဖြစ်သော ကြောင့် ညဘက်တွင် သူ့အိမ်၌ လူများစုပြန်လေသည်။ သို့သော် ဒေါ်သန်းမြိုင် အိမ်တွင် စုကြသော လူများတော့ မဟုတ်ပါ။ ကျွန်တော် နှင်းအေးတို့အိမ်သို့ မရောက်ရသည် မှာ ထိုအကြောင်းလည်း တစ်ချက်ပါပေသည်။

    အဘွားလေးထံတွင် စုကြသော အမျိုးသမီးထဲတွင် နှင်အေးနှင့်ခပ်ဆင်ဆင် မြနှစ်ဆိုသူ အမျိုးသမီးကလေး တစ်ယောက်လည်း ပါရှိပေသည်။ သူမသည် ကျွန်တော်တို့ထက် ဂုဏ်အဆင့် အတန်းနိမ့်သည်။ မြနှစ်၏ မိဘများသည် လယ်သမားများပင် ဖြစ်ကြသော်လည်း ကျွန်တော်တို့ကဲ့ သို့စာရင်းငှား သုံးလေးယောက်နှင့် လုပ်နိုင်သူများ မဟုတ်ကြ။ စပါးဝမ်းစာမှလည်း လုံလောက်စွာမရှိ။ ကျွဲနွားလည်း မရှိသောကြောင့် တစ်တုံးထွန်အတွက်ကိုပင် တခြားသူထံမှ နွားကို ငှားရမ်းထွန်ရလေသည်။ ပြီးနောက် သူမ၏ အဖေမှာလည်း အဖေအရင်းမဟုတ်ဘဲ ပထွေး ဖြစ်သောကြောင့် မြနှစ်မှာ မျက်နှာငယ်လှပေသည်။

    ကျွန်တော်သည် ကိုယ့်ထက် အဆင့်အတန်း နိမ့်ကျသူ မြနှစ်ကလေးအား စိတ်ဝင်စားလာ မိသည်။ နှင်းအေးလို ကိုယ့်ထက် အဆင့်အတန်းမြင့်သူကို လပ်ထပ်မည့်အစား ကိုယ့်ထက်နိမ့်သူ မြနှစ်ကိ လက်ထပ်ရလျှင် ကောင်းလေမည်လားဟု စဉ်းစားကြည့်မိသည်။ သို့သော် မြနှစ်အား ကျွန်တော် မကြိုက်သော အချက်တစ်ချက် ရှိလေသည်။ ထိုအချက်မှာ မြနှစ်သည် နှင်းအေးလို သိမ်မွေ့ခြင်းမရှိဘဲ အပြောကြမ်း၊ အနေကြမ်း၊ အစားကြမ်းထဲက ဖြစ်သည်။ ထို့ကြောင့် ကျွန်တော် သည် မြနှစ် မှာ အောက်တန်းစား ဆန်လွန်းသည်ဟု ယူဆကာ မနှစ်သက်နိုင်ဘဲ ရှိနေရလေသည်။
    မြနှစ်သည် ကျွန်တော်ကသာ ဆွတ်မည်ဆိုက ညွှတ်ရန် အသင့်ရှိနေသည်ကို ကျွန်တော် သိပါသည်။ သို့သော် ကျွန်တော်သည် စဉ်းစားချိန်ဆ၍ မရနိုင်သောကြောင့် သူမအား ချစ်စကားစ၍ မဆိုဘဲ ခပ်တည်တည် သာ နေခဲ့လေသည်။
    “ဟေ့ လူလေး၊ မင်းမြနှစ် ကို ယူပါလားကွ”

ဆက်ရန်.
Ref: ရွှေစင်ဦး