တန်းစီခြင်း (သို့မဟုတ်) တုံကင်ယူခြင်း
မြန်မာပြည်မှာတော့ တန်းစီခြင်းကို တွင်တွင်ကျယ်ကျယ် သုံးလေ့မရှိတာကို တွေ့ရပါတယ်။ တန်းစီခြင်းနဲ့ အလားတူတဲ့ တုံကင်လက်မှတ် ယူခြင်းဆိုတာလဲ ရှိပါသေးတယ်။ တန်းစီခြင်းကိုတော့ အနည်းအကျဉ်းတော့ တွေ့ရတတ်ပါတယ်။ သင်တန်းတစ်ခုခုတက်တဲ့အခါတွေ၊ စစ်သားများ၊ ရဲသားများ အမှတ်စဉ်ခေါ်သော အခါမျိုးတို့တို့မှာ စသဖြင့် သုံးစွဲကြတာများပါတယ်။ ငယ်ငယ်တုန်းက သမ၀ါယမဆိုင် တန်းစီဘူးတယ်။ တော်တော်လေးကို ဒုက္ခရောက်ပါတယ်။ လူကြားထဲမှာ မွန်းကြပ်တဲ့ ဒုက္ခက တော်တော်လေးကို ဆိုးဝါးပါတယ်။ တန်းစီမှု့အလေ့အကျင့် မရှိကြတော့ ကိစ္စတိုင်းမှာ စုပြုံတိုးနေရတော့တာပါပဲ။ တန်းစီခြင်းဟာ ဘယ်လောက် ထိရောက်ကောင်းမွန်တယ်ဆိုတာ လူများများနှင့် သက်ဆိုင်တဲ့ ကိစ္စတွေမှာ သိနိုင်ပါတယ်။
စာရေးသူရဲ့ အတွေ့အကြုံအရ တစ်ခုကို တင်ပြလိုပါတယ်။ တစ်နေ့ မလေးရှားကို သွားတဲ့ ခရီးစဉ်တစ်ခုမှာ ဖြစ်ပါတယ်။ စာရေးသူနှင့် လေယာဉ်တစ်စီးထဲ ရွှေမြန်မာတွေတော်တော်များများ ပါလာကြပါတယ်။ လ၀ကကောင်တာရှေ့ရောက်တော့ ရွှေမြန်မာတွေက တန်းစီရမှန်းမသိကြပါဘူး။ ဘေးက ပါလာကြတဲ့ နိုင်ငံခြားသားခရီးသွားတွေက အထင်သေးတဲ့ မျက်လုံးတွေနဲ့ ကြည့်ခြင်းကို ခံရပါတယ်။ ခဏကြာတော့ တာဝန်ကျ ရဲအရာရှိတစ်ယောက်ရောက်လာပြီး တန်းစီကြဖို့ရယ်၊ သတ်မှတ်ထားတဲ့ စီးမျဉ်းကို မကျော်ဖို့ရယ်၊ တစ်ယောက်ချင်းစီ လာဖို့ရယ်ဆိုပြီး သြ၀ါဒတွေ ပေးပါလေရော။ စာရေးသူကတော့ တုံးထုပြီးသူဖြစ်ခြင်းကြောင့် အပြင်တစ်နေရာကနေပြီးတော့ သူတိုကတွေ ဘာဆက်ဖြစ်မလဲဟု ကြည့် နေခဲ့ပါတယ်။ တစ်ခဏနေတော့ အုပ်စုလိုက်ကြီး အခြားတစ်နေရာကို ခေါ်သွာတာ တွေ့လိုက်ရပါတယ်။ နောက်ပိုင်း သူတို့တွေ ၀င်ခွင့်ရ၊ မရတော့ မသိတော့ပါဘူး။ ကိုယ်လဲ လာကြိုနေတဲ့ သူတွေနောက်ကို လိုက်သွားခဲ့ပါတယ်။
ဒီတော့ နိုင်ငံခြားတိုင်းပြည်တော်တော်များများမှာ တန်းစီရတယ်ဆိုတာကို ရွှေမြန်မာ တော်တော်များများရဲ့ စိတ်ထဲမှာသိကြပုံ မပေါ်ဘူး။ မြန်မာတို့မှာ တစ်စုံတစ်ယောက်၏ သြဇာ အာဏာကို အသုံးပြုပြီး မိမိကိစ္စပြီးမြောက်အောင်၊ သူတစ်ပါးထက် အလျှင်ပြီးအောင် လုပ်ခဲ့ကြသည်မှာ တော်တော်လေးကို အရိုးစွဲနေပုံရပါတယ်။ နိုင်ငံခြားတိုင်းပြည်တိုင်းမှာ သမ္မတစီးတဲ့ကားပင်ဖြစ်စေ မီးနီနေရင်တော့ ရပ်ထားရမည်ဖြစ်ပါတယ်။ ငါ သမ္မတပဲ ကျော်တတ်မည်ဟု လုပ်လို့မရပါဘူး။
စာရေးသူဟာ အခု သြစီမှာနေသူဖြစ်နေတော့ သြစီကအကြောင်းကို ပြောချင်ပါတယ်။ ဒီမှာကတော့ ဌာနအားလုံးမှာ တန်းစီစနစ် (သို့မဟုတ်) တုံကင်ယူစနစ်ပါပဲ။ ဘယ်နေရာကြည့်ကြည့် ဒါမျိုးတွေပဲ တွေ့ရမှာပါ။ ယုတ်ဆွအဆုံး ကေအက်စ်စီတို့၊ မက်ဒေါ်နယ်တို့ ဆိုင်တွေပင်လျှင် တန်းစီမှ ရပါသည်။ ပြီးခဲ့တဲ့ လပိုင်းများက မဲထည့်ဖို့ပင်လျှင် တန်းစီစောင့်ရတာကို တွေ့ခဲ့ရပါတယ်။
စာရေးသူ မြန်မာနိုင်ငံမှာရှိစဉ် နိုင်ငံကူးလက်မှတ်ရုံးကို သွားရာ တုံကင်မရှိ။ တန်းစီမှု့ မရှိတာကို သတိထားမိပါတယ်။ အခုတော့ တုံကင်ယူရသည်ဟု အသံကြားမိပါတယ်။ အလွန် ကောင်းပါတယ်။ တဆက်တည်း အနေဖြင့် လူများတဲ့နေရာ အားလုံးမှာ တန်းစီခြင်း (သို့မဟုတ်) တုံကင်စနစ်ကို အသုံးပြုသင့်ပါကြောင်း သက်ဆိုင်ရာများအား တိုက်တွန်းချင်ပါတယ်။
မတူတာလေးတွေ ပြောပါတယ်။
နောက်အပတ်မှ ဆုံကြတာပေါ့
No comments:
Post a Comment