ကျုပ်တို့မြို့နယ်က တောရွာအများစုဟာ မြန်မာ့ရိုးရာ ဆိုင်းဝိုင်းကို အရမ်းအားပေးကြပါတယ်။ ရှင်ပြုအလှူပွဲတွေဆိုရင် ရန်ကုန်ဆိုင်းကောင်းကောင်းကို ငှားလေ့ရှိပါတယ်။ ဆိုင်းကို အားပေးပုံကတော့ မိုးလင်းမှ ပြန်ကြတာပါ။ တစ်ချို့ရွာတွေဆိုရင် နာမည်ကျော် အဆိုတော်များကို ငှားရမ်းပြီး ဆိုင်းနဲ့ သီဆိုခိုင်းတာပါ။
တစ်ခုသော အခါကပေါ့။ ကျုပ်တို့ လှည်းကူးနယ်က ရွာကြီးတစ်ရွာမှာ ကျောင်းထိုင်ဆရာတော်က ဦးစီးပြီး ရှင်ပြုအလှူပွဲကြီး ကျင်းပပြုလုပ်ပါတယ်။ ဆိုင်းကတော့ နိုင်ငံကျော် စိန်စတင်းဆိုင်းပေါ့။ ပြီးတော့ ရန်ကုန်က အဆိုတော် စိုးစန္ဒာထွန်းကိုလဲ ညပိုင်းမှာ သီချင်းသီဆိုဖို့ ငှားထားပါတယ်။ အလှူနေ့မှာ စိုးစန္ဒာထွန်းက ဆရာတော်ရဲ့ ကျောင်းကို လာရောက်ပြီး ကန်တော့ပါတယ်။ အဲဒီလို ကန်တော့ပြီးတော့ ဆရာတော်ကို ဆုချဖို့ လျှောက်ထားတောင်းဆိုပါတယ်။ ဆရာတော်ကလဲ သူဆိုစေချင်တဲ့ သီချင်းတွေကို သီဆိုဖို့ တာဝန်ပေးပါတယ်။
ညဖက် ဆိုင်းနဲ့အတူ စိုးစန္ဒာထွန်းက သီချင်းမဆိုခင် အောက်ပါအတိုင်း ပြောပါတယ်။
' အခု သမီး စိုးစန္ဒာထွန်း သီဆိုမယ့် သီချင်းကတော့ ဆရာတော်ဘုရား တောင်းဆိုထားတဲ့ မောင့်အချစ်မြှား ဖြစ်ပါတယ်ရှင့်'-
အဲဒီလိုလဲ ပြောလိုက်ရော ပရိသတ်က ဝေါကနဲ ရီကြပါတော့တယ်။
နောက်တစ်ပုဒ်ကြတော့လဲ အရင်တစ်ပုဒ်အတိုင်းပဲ မဆိုခင် အောက်ပါအတိုင်း ပြောပါတယ်။
' အခုတစ်ခါ သမီး စိုးစန္ဒာထွန်း သီဆိုမယ့် သီချင်းကတော့ ဆရာတော်ဘုရားကြီးပဲ တောင်းဆိုထားတာဖြစ်ပါတယ်။ သီချင်းနာမည်ကတော့ မျက်လုံးဖွင့်ပြီး အိပ်ကြည့်ပါ- ဖြစ်ပါတယ်ရှင့်'-
အဲဒီလိုလဲ ပြောလိုက်ရော ပရိသတ်က ဝေါကနဲ ထရီကြပါတော့တယ်။
စိုးစန္ဒာထွန်းက ဒါကို သဘောမပေါက်ဘူး။ သုံးပုဒ်မြောက်မှာလဲ အောက်ပါအတိုင်းပြောခဲ့ပါတယ်။
' အခုတစ်ခါ သမီး စိုးစန္ဒာထွန်း နောက်ဆုံးသီဆိုမယ့် သီချင်းကတော့ ဆရာတော်ဘုရားကြီးပဲ
တောင်းဆိုထားတာဖြစ်ပါတယ်။ သီချင်းနာမည်ကတော့ မေတ္တာ ကမ္ဘာများဖြင့် မခြားလိုတယ် ဖြစ်ပါတယ်ရှင့်'-
ဆိုင်းလာကြည့်တဲ့ ပရိသတ်ကတော့ တဝေါဝေါနဲ့ပေါ့။
တောကဟာသလေးတွေကို ပြောပါတယ်။
မောင်နေခြည် (လှည်းကူးမြေ)
No comments:
Post a Comment