မာစီဒီးပဲ စီးတယ်

ဒီတစ်ပတ်တော့ သြစီက Bus တွေ အကြောင်းကို ရေးမယ်လို့ စိတ်ကူးမိပါတယ်။ သြစီက Bus တွေကို စီးမယ်ဆိုရင် ရထားတွေမှာလို ကြိုတင်လက်မှတ်ဝယ်ယူနိုင်သလို ကားပေါ်ရောက်မှ ၀ယ်လို့လဲရပါတယ်။ မြို့ထဲမှာ ဆိုရင်တော့ ကားလက်မှတ်ကို ဈေးဆိုင်တွေက တဆင့်ဝယ်ရပါတယ်။ Bus ပေါ်မှာ မရောင်းပါဘူး။ လက်မှတ်ကို တပတ်စာကြိုတင်ပြီးတော့လဲ ၀ယ်နိုင်ပါတယ်။ Bus ကားမောင်းသူတွေဟာ များသောအားဖြင့် အမျိုးသားတွေဖြစ်ပါတယ်။ အမျိုးသမီး Bus ကား မောင်းသူတွေကိုလဲ တစ်ခါတစ်ရံ တွေ့နိုင်ပါတယ်။
များသေားအားဖြင့် မြို့ပြင်မှာ ဆိုရင်တော့ ၁၅ မိနစ်ကို တစ်စီးတော့ ပုံမှန်ထွက်ပါတယ်။ ဆစ်ဒနီမြို့ထဲမှာတော့ ရန်ကုန်အတိုင်းပါပဲ။ Bus ကား တော်တော်ပေါပါတယ်။ ကားကြပ်လေ့မရှိပါဘူး။

”မာစီဒီးပဲ စီးတယ်”ခေါင်းစဉ်ကို တွေ့လိုက်ရတော့ စာဖတ်သူရဲ့ စိတ်ထဲမှာ တစ်မျိုးလေးတော့ ဖြစ်သွားမယ်ထင်ပါတယ်။ ဒီကောင် ကြွားလှချည်လားပေါ့။ တကယ်ပါ မာစီဒီးကားကိုပဲ ကျွန်တော်စီးတယ်။ ဘာ့ကြောင့်လဲဆိုတော့ သြစီက Bus ကားတွေဟာ များသောအားဖြင့် မာစီဒီးကားတွေ ဖြစ်လို့ပါပဲ။ စာရေးသူဟာ ကိုယ်ပိုင်ကားရှိသူ မဟုတ်တော့ ကျောင်းတက်ရင် ရထား (သို့မဟုတ်) Bus နဲ့ပဲ သွားပါတယ်။ Bus တိုင်းမှာ အဲယားကွန်းပါပါတယ်။ Bus အများစုကတော့ Wheelchair အသုံးပြုသူတွေ၊ ခလေးတွန်းလှည်းတွေ အတွက် တက်နိုင်၊ ဆင်းနိုင်တဲ့ Bus တွေဖြစ်ပါတယ်။

Busကားမောင်းသူတွေဟာ အရမ်းပဲ စည်းကမ်းလိုက်နာကြပါတယ်။ မြန်မာပြည်မှာလို မှတ်တိုင်မဟုတ်တဲ့ နေရာတွေမှာ ဘယ်တော့မှ ရပ်လေ့မရှိပါဘူး။ Busရဲ့ ရှေ့အပေါက်သည် ခရီးသည်များ တက်ရောက်ရန်ဖြစ်ပြီးတော့ နောက်အပေါက်သည် ဆင်းရန် အပေါက်ဖြစ်ပါတယ်။ ဘယ်သူမှလဲ နောက်အပေါက်ကနေ မတက်ပါဘူး။ Bus ကားတိုင်းမှာလဲ စပယာမပါပါဘူး။ ကားပေါ်မှာ အစားအသောက်စားခြင်း၊ ဆေးလိပ်သောက်ခြင်း စတာတွေကို ခွင့်မပြုပါဘူး။ CCTV နဲ့ အချိန်ပြည့် မှတ်တမ်းတင်ထားရှိပါတယ်။ မိမိပစ္စည်းမေ့ကျန်ခဲ့ရင်တောင် စိတ်ပူစရာ မလိုပါဘူး။ ပြန်ရနိုင်ပါတယ်။

ဒါကြောင့် ပြောပါတယ်။ ”မာစီဒီးပဲ စီးတယ်” လို့။

နောက်တစ်ပတ်မှာတော့ Sightseeing Bus နဲ့ Sydney တစ်မြို့လုံး သွားရောက်ပုံကို တင်ပြလိုပါတယ်။